कलिउडलाई नंग्याउने कलिउड हेर्नुस

भिडियो हेर्न तल क्लिक गर्नुहोस् !

काठमाडौं, ७ माघ । हलिउड र बलिउडको नक्कल गर्दै नेपाली चलचित्र उद्योगलाई कलिउड भन्ने गरिएको छ । यद्यपि, हलिउड र बलिउडको जस्तो ग्ल्यामर अनि क्रेज यहाँ छैन । आफ्नै समाजमा पनि भिज्न नसकेको नेपाली चलचित्र उद्योगभित्र विकृतिका चाङ छन् । चलचित्र कलिउडले यिनै विकृतिलाई खोतल्ने प्रयास गरेको छ र, त्यसमा केही हदसम्म सफलता पनि पाएको छ । यद्यपि गहन अध्ययन नगरी चलचित्र बनाउन हतारिँदा निर्देशक नवराज आचार्यको पहिलो प्रयास शतप्रतिशत सफल भने नभएको समाचार आजको सौर्य दैनिकले छापेको छ ।
शीर्ष भूमिकामा अभिनय गरेका आर्यन सिक्देल (सफल), प्रियंका कार्की (काव्य) पायल थापा (लक्की) र विष्णु कार्की (विनय) को वरिपरि घुमेको छ चलचित्र । हिरोइन बन्ने सपना बोकेर गाउँबाट काठमाडौं छिरेकी काव्य र लक्की रूप पार्टनर हुन्छन् ।

पहिलेदेखि नै यसक्षेत्रमा संघर्षरत लक्की आफूलाई निर्मातासामु हरतरहले समर्पण गरेर भए पनि थोरबहुत सफलता हासिल गर्छिन् । काव्य भने कम्प्रोमाइज गर्ने पक्षमा छैनन् । त्यसैले निर्माता निर्देशकसँग लगातार भेटका क्रममा पनि उनको हातमा चलचित्र पर्दैन । अन्तत: केही पाउन केही गुमाउनु पर्छ भन्ने निष्कर्षमा पुगेर उनी पनि एक निर्मातालाई रिझाउन सफल हुन्छिन् । फलस्वरूप एउटा चलचित्रमा हिरोइनको रोल हासिल गर्छिन् । चलचित्रमा उनको अपोजिट हुन्छन् सफल । सुपरस्टार सफल र काव्य अभिनयको सिलसिलामा नजिकिन्छन् । यी दुबैबीच प्रेम अँकुराउँछ । यता पत्रकार विनयले पनि काव्यप्रति भित्रभित्रै प्रेम पाल्न थालेका छन् । पत्रकार विनयको मद्दतले काव्यले सफलताको अर्का रूप देख्छे । तब काव्य र सफलको प्रेमले नयाँ मोड लिन्छ ।
   
पैसा र नाम कमाउने ध्याउन्नमा हिरोइन बन्न नाजायज सम्झौता गर्ने कथा नेपाली चलचित्रका लागि नौलो होइन । त्यस अर्थमा यस चलचित्रले कुनै नयाँ कुरा पस्किन सकेको छैन । तथापि प्रस्तुतीकरण र कथाको बहावले दर्शकलाई बाँधिराख्न भने सफल छ । यसै पनि नेपाली चलचित्रबारे समाजमा सकारात्मक विचारधाराको अभाव रहेका बेला चलचित्र क्षेत्रलाई पूरै नकारात्मक रूपमा प्रस्तुत गरिनु कतिको जायज होला भन्ने प्रश्न उठेको छ । यसले नेपाली चलचित्र उद्योगका सेलिब्रेटीलाई यौनभोकाका रूपमा मात्र चित्रण गरेको छ । कलिउड नगरीलाई विषय बनाइए पनि मूल कथा भने त्रिकोणात्मक प्रेममा अल्मलिएको देखिन्छ ।

पटकथा त्यति दमदार नभए पनि पात्रले बोल्ने सम्वादमार्फत भने केही मिठास दिन खोजिएको छ । सधैँ रक्सी र चुरोटको सर्कामा रमाउने स्टारको भूमिकामा देखिएका आर्यन अभिनयमा जमेका छन् र आफ्नो स्टार भ्यालु साबित गरेका छन् । यद्यपि उनको भूमिकाले उनकै बारेमा बाहिर आएका नकारात्मक समाचार पुष्ट्याइरहेको जस्तो लाग्छ । लक्कीको भूमिका निर्वाह गरेकी पायल थापाको अभिनय चलचित्रको सबल पक्ष हो । निर्माताको रोलमा देखिएका पत्रकार सुव्रत आचार्यको भूमिका छोटै भए पनि प्रभावकारी छ । पत्रकारको भूमिका निर्वाह गरेका विष्णु कार्कीले पहिलो चलचित्रमा नै सम्भावना देखाएका छन् ।

भिडियो हेर्न तल क्लिक गर्नुहोस् !

Category: Nepali Movie Gossips