तन्नेरीहरुको दौरासुरुवाल मोह

भिडियो हेर्न तल क्लिक गर्नुहोस् !

२५ माघ, काठमाडौं । विवाहमा जन्त जाँदा चिटिक्क परेर टाइसूटमा ठाँटिने ठिटाहरुको मोह फेरिन थालेको छ । हिजोआजका जन्ती हेर्ने हो भने टाइसूटमा गमक्क परेका पनि उत्तिकै देखिन्छन् । दौरासुरुवाल र ढाका टोपीमा ठाँटिनेहरु पनि भेटिन्छन् । ठिटाहरु मात्र होइन, टुकुटुक हिँड्ने बच्चाहरुलाई समेत झिल्के दौरासुरुवाल लगाइदिएर आहा…..बाबु कति राम्रो भनेर फुक्र्याउने चलन छ ।

केहीवर्ष पहिलेसम्म जन्त जान टाइसूट र कोट लगाउनुपर्ने अनिवार्य जस्तै थियो । अरुबेला नलगाएपनि जन्त जानको लागि मात्रै भएपनि टाइसूट किनेर दराजमा राख्ने चलन अझै पनि धेरैको छ । कतिले त अरुको मागेर पनि काम चलाइरहेका छन् । तर अहिले विवाहमा टाइसूट मात्र होइन दौरासुरुवाल लगाउनेहरुको संख्या पनि बाक्लिन थालेको छ ।‘अरुले लगाउन थाले, देख्दा नौलो र राम्रो हुने भएकाले मैले पनि जन्त जाने बेला टाइसूटको सट्टा यही लगाउन थालेको छु’ राजधानीको एउटा बिहे पार्टीमा भेटिएका गोरखाका चेतन रेग्मीले भन्नुभयो ।

चार पाँच वर्षअघिको अवस्था हेर्ने हो भने दौरासुरुवाल लगाउने कि बुढाहरु हुन्थे, कि मन्त्री लगायतका अरु सरकारी उच्च कर्मचारी । माओवादीले सरकारको नेतृत्व गर्न थालेपछि प्रधानमन्त्री र मन्त्रीहरुले समेत दौरासुरुवाल लगाउन छाडे । अब दौरासुरुवालको प्रचलन हट्ने हो कि भन्ने आशंका बढिरहेको बेला ठिटाहरुको दौरा मोहले धेरैलाई सन्तुष्ट बनाएको छ ।

‘दौरासुरुवाल राष्ट्रिय पोशाकसँगै संस्कृति चिनाउने माध्यम पनि हो भन्ने कुरा धेरैले बुझ्न थाले’ संस्कृतिविद मोदनाथ प्रश्रतिले अनलाइनखबरसित भन्नुभयो-’रमाइलो र देखासिकी मात्रै होइन, पहिचानको लागि पनि दौरासुरुवालप्रतिको आकर्षण बढेको हो ।’

सिलाउनेलाई भ्याईनभ्याई

राजधानी लगायतका मुख्य शहरका टेलरिङ सेन्टरमा अहिले टाइसूट मात्रै होइन दौरा सुरुवाल सिलाउने कामको पनि चाप बढेको छ । ‘वर्ष दिनपहिलेसम्म हामी कोट, पाइन्ट, टाई, सूट मात्र सिलाउँथ्यौं, तर अहिले दौरासुरुवालको समेत अर्डर आउने गरेको छ’ श्रेष्ठ टेलरिङका सलिम खानले भन्नुभयो-’हिजोआज धेरै युवाहरुले सूटको सट्टा दौरासुरुवाल खोज्न थालेका छन् ।’

६९ वर्षदेखि दौरासुरुवाल मात्र सिलाउँदै आएको राजधानी न्यूरोडको राष्ट्रिय दौरासुरुवाल टेलर्समा पनि विवाह ब्रतबन्धको बेला यसैगरी भीड बढ्छ । ‘पहिले सरकारी कर्मचारी र बुढाहरु सिलाउन आउँथे, अहिले त ठिटाहरु समेत आउने गरेका छन्’ टेलर्सका सञ्चालक हिराबहादुर शाक्यले अनलाइनखबरसित भन्नुभयो-’विवाह र ब्रतबन्धको बेला दौरासुरुवाल लगाउने चलन बढ्न थालेको छ ।’

सामान्य खालको टाइसूट सिलाउन कपडा समेत गरी १२/१४ हजार रुपैंया पर्छ । तर सामान्य खालको दौरासुरुवाल १५ सय रुपैंयामै तयार हुन्छ । ढाकाको राम्रो सिलाउने हो भने पनि पाँचहजार रुपैंयामा तयार हुन्छ । तर सस्तो मात्रै नभएर संस्कृति बुझेकाले पनि यसतर्फ आकर्षण बढेको धेरैको ठम्याई छ ।

भिडियो हेर्न तल क्लिक गर्नुहोस् !

Category: Latest News